Parte-hartze prozesuaren ondorioen aurkezpena

Oñatiko Emakumion Etxia Eraikitzen parte-hartze prozesuak bi urteko ziklo bati itxiera eman dio eta jendaurreko ekitaldi irekia egin dugu Eltziako Topagunean. Ekitaldia herritar orori lanaren emaitza ezagutarazteko baliatu dute bai udal ordezkariek eta baita denbora honetan guztian modu batera edo bestera prozesuan parte hartu duten emakumeek ere. 

Prozesuan zehar oinarri sendoa jarri zaio etxeari. Bertan erabaki eta adostu dira etxearen oinarri teorikoa; misio, ikusmira eta balioak; etxearen jarduna; parte-hartze estrategiak; kudeaketa eredua; antolaketa sistema; eta, guztia egikaritzeko beharrezko izango diren baliabide material zein humanoak. Eta atzoko ekitaldian, ondorio horiek guztiak biltzen dituen liburuxka ere aurkeztu genuen, webgune honetan ere irakurri edo deskargatzeko aukera duzuna. 

Oinarri eta norabide hori finkatuta, prozesuak etapa berri bati ekingo dio etxearen barruko lanak amaitu eta irekitzeko prest egon bitarte horretan. 2024-2025 ikasturtean lan talde ezberdinak eratuko dira, eta pentsatzetik ekintzara salto egingo dugu. Taldeka, lanean hasiko gara, etxeak ateak irekitzen dituenerako dena prest izateko. Horretarako, talde ezberdinetan izena emateko aukera zabaldu dugu webgune honetan bertan.

Beraz, batu gurekin, eman izena eta abia gaitezen!