Zorua aldatu eta zatitze gela handitu dute Zubillaga-Oñati hiltegian

  Etengabeko hobekuntza prozesuan murgilduta dago Zubillaga-Oñati Hiltegi eta Zatitze Zerbitzua. Berritze lanak egin dira azken asteotan, zoruan eta zatitze gelan.

  Aldaketa nagusia instalazioen zoruan egin da; irristagaitza eta hondakinak garbitzeko errazagoa den zorua jarri da. Aurretik zegoen zoruan nabaria zen lanaren ondorioz eragindako kaltea. Osasun sailak eskatutakoari egokitutako zoru berria jarri da.

  Zatitze gelan ere egokitze lanak egin dira: gela handitu da eta destentsore sistema berritu da, hezurgabetzeko baliabideak aldatuz. Modu honetan, zatitze gelan lanean ari diren profesionalen lan-baldintzak hobetzeaz gain, bezeroari eskainitako zerbitzuaren kalitatea hobetu nahi da, eskaria bermez erantzun ahal izateko.

  Uda garaian murriztu egiten da eskari kopurua Zubillaga-Oñati hiltegian. Lan bolumen txikiagoko urte-sasoi hori probestu da instalazioetan berritze lanak egiteko.

Iturria: Oñati Irratia