Workshop denboraldi berria hasi da Nazioarteko Lege Soziologia Institutuan

  Mobilizazio legala eta protesta kulturaren azpiegiturak izeneko lan bilerak eman dio hasiera gaur goizean Lege Soziologia Institutuko 2025eko workshop denboraldiari; uztaila amaiera bitartean 15 mintegi izango dira unibertsitate zaharrean. 

  Bihar arratsaldera arte luzatuko den mintegi hau Gipuzkoako Foru Aldudiarekin lankidetzan antolatu du Lege Soziologia Erakundeak eta koordinatzailetako bat, Euskal Herriko Unibertsitateko aditua da. Kale mobilizazioak eta protestak herritarrek agintariekiko dituzten desadostasun eta kexak adierazteko bide izan dira urteetan. Baina protesten muga legalak eta adierazpen bide honek demokrazia eraldatzeko duen potentzialari buruzko eztabaida zabaltzen ari da. 2011an udaberri arabiarra deitu zenak, Europa mailan nekazariek, garraiolariek eta beste zenbait kolektibok egin dituzten protestaldiak edota Euskal Herrian bertan euskararen normalkuntzaren kontra kaleratu diren hainbat ebazpen judizialen harira sortutako mobilizazioak ikerketa gai bihurtu dira eta horretaz eztabaidatzen ari dira Sancti Spiritus unibertsitatean. Ghana, Sudan, Polonia, Papua Mendebaldea edota Espainiako kasu ezberdinak azalduko dira eta mintegia, mahai inguru batez amaituko da, bihar arratsaldean. Giza eskubideen defentsa, protesta eta mobilizazio eredu ezberdinak, aldaketarako bideak eta oinarri legalak eztabaidagai izango dira. 

  Baina gaurkoarekin hasi besterik ez dira egin Lege Soziologia Institutuko mintegiak, esan bezala. 2025eko workshop egitaraua 15 mintegik osatzen dute eta horietako hirutan EHUko ikerlari eta irakasleak arituko dira koordinazio lanetan; bitan, nazioarteko beste unibertsitateetako ikerlariekin batera, gaur hasi denaren antzera, eta uztailaren 17 eta 18an izango den mintegian, Adimen artifizialak herri kulturan eta araudian duen eraginaren azterketa, lege soziologia ikuspegitik izenekoan euskal adituak arduratuko dira koordinazio lanaz. Aurtengo azken mintegia berriz, uztailaren 28 eta 29an egingo da.

Iturria: Oñati Irratia