Txiki txoko haur eskolan gaurtik maiatzaren 9ra arte bete daiteke 2022-2023 ikasturterako matrikula

  Txiki txoko haur eskolan hasi dira ikasturte berria prestatzen. Ate ireki jardunik berreskuratuta apirilaren 25, 26 eta 27an izango da instalazioak bertatik bertara ezagutzeko aukera, 17:00tatik 18:00tara. Edo beste egun eta ordu tarte batean ere bai, aurrez hitzordua eskatuta. Bide batez, zentroak eskaintzen dituen zerbitzuak, kuotak edota izena emateko aurkeztu behar diren agirien inguruko xehetasunak nahi dituztenek ere, informazioa bertatik pasata edo telefonoz deituta eskuratuko dute. Hauxe da zenbakia: 943 716 405.

  Oraingo matrikula epea irailetik aurrera hasiko diren haurren izena emateko da, hau da, 2021ean edo 2022 honetan jaiotako haurren izena emateko. Gurasoek egun erdi edo egun osoko egonaldia aukeratu dezakete. Ordaindu beharreko kuota aukeratutako ordu kopuruaren araberakoa da eta baita gurasoen diru sarreren araberakoa. Izan ere, matrikula doan baita 18.000 eurora arteko errenta duten familientzat eta seme-alaba bat baino gehiago dutenen kasuan, bigarrena eta hurrengoak matrikulatzerakoan. Alde horretatik lau matrikula tarte edo tramu bereizten dira familien errentaren arabera.
Txiki txokok lau gela ditu eta 42 plaza guztira, 8na, 0-1 urte arteko geletan eta 13na, 1-2 urte artekoen geletan. Talde guztietan lekua badago, nahiz eta nagusien gelan 9 plaza beteta dauden datorren ikasturterako.

  Haurren izen-ematea aurrez aurre egin liteke Txiki Txokon bertan edota telematikoki www.haurreskolak.eus atariaren bitartez, gaur hasi eta maiatzaren 9ra arte. Baina tartean, apirilaren 14tik 23ra ezingo da izenik eman Txiki txokon, oporretan itxita egongo baita.

Iturria: Oñati Irratia