Pitin bat gora egin du langabeziak azken hilabetean, 3 langabe gehiago zenbatu dira gurean

  45 urtetik gorako gizonezkoen artean handitu da bereziki langabeen kopurua gurean; 25-44 urte artekoen artean eta emakumeen artean, pitin bat murriztu baita martxoan zehar. Aldea ez da handia, 3 langabe gehiago, eta otsailean bezala martxoan ere, Oñatiko langabeen kopurua 300eko langatik behera mantentzen da. 

  Orain urtebeteko datuekin konparatuta aldea dezentez handiagoa da, 57 langabe gutxiago daudelako egun; ondorioz, tasa puntu bat murriztu da urtebeteko epean, % 6,48tik % 5, 43ra. Tasa horri erreparatuta, ia urtebete eman du %6aren azpitik; apirilean kokatu zen maila horretatik behera eta abuztuan soilik gainditu zuen berriro. Urteko lehen hiru hilabeteetako tasaren bataz bestekoa eginda, berriz, %5,51 da, urteetan ikusi ez dugun tasarik baxuena.

  Debagoieneko datu orokorrei erreparatuta, 4 langabe gutxiago zenbatu dira eskualdean azken hilabetean, bereziki Bergaran izan den jaitsierari esker. Bergaran eta Elgetan otsailean baino langabe gutxiago erregistratu dira martxoan, gainontzeko herrietan, gehiago izan dira. 

  Eta Hego Euskal Herri mailan ere langabeziak beheranzko joerari eutsi dio martxoan, Araba salbuespena izan bada ere; otsailean baino 359 langabe gutxiago zenbatu ziren. Aipagarria da, Hego Euskal Herri mailan, Oñatin bezala, langabe dauden emakumeen kopurua murriztu dela nagusiki. Martxoa ez da gorabehera handiko hilabetea izaten, orokorrean. Gabonen ostean zerbitzuetan lanpostu ugari galtzen dira eta otsailean eta martxoan horien zati bat berreskuratu ohi da. Aurten ere hala gertatu da, neurri batean. Afiliazio datuei berriratuta, berriz, Gizarte Segurantzan izena emandakoen kopurua inoizko handienaren parekoa da ia.

Iturria: Oñati Irratia