Oñatiko Blues Festibala egingo da apirilaren 25 eta 26an

  Pasa den asteko Osoko Bilkuran azaldu zen Oñatiko Blues Elkarte- OBE- sortu berriak Oñatiko Lehen Blues Jaialdia antolatu duela. Horretarako udalaren dirulaguntza eskatu zuten eta lankidetza hitzarmen baten bidez bideratzea erabaki zen. 5.100 euroko dirulaguntza jasoko dute. 

  Apirilaren 25 eta 26an ospatuko da blues jaialdia eta bi eszenatokitan lau talderen emanaldiak izango ditugu. Hilaren 25eko emanaldia Antixena gaztetxean izango da, eta Euskal Herriko taldeak izango ditugu bertan protagonista: Tobako Road gasteiztarrak eta Arima Soul zarauztarrak arituko direlako. Aipagarria da gainera, berriki jakinarazi dela Arima Soulek Donostiako Jazzaldian parte hartuko duela, konkretuki, Chillida Lekun kontzertua eskainiz. Aurretik, Gaztetxean eta Oñatiko Lehen Blues Festibalean jotzen entzun ahal izango ditugu. 

  Bigarren egunean, berriz, apirilaren 26an, Katalunia eta Andaluziako artistak izango ditugu Gaztelekuan. Indigo Blues kataluniar taldearen zuzenekoak ez dira oso ohikoak baina OBEk gurera etorri daitezen lortu du. Kartela osatzen Mingo & Sanpa Blues Blast andaluziarrak izango ditugu. Bigarren kontzertu honetarako sarrerak dagoeneko salgai daude Txokolateixan eta www.oñati.eus atarian.

  Rhythm and blues eta soul doinuak nagusi izango ditugu Oñatin, apirilaren 25 eta 26an.

Iturria: Oñati Irratia