Oñatiko 10 zerbitzu eta enpresek Kode Etikoaren turismo ziurtagiria berritu dute

  Euskadiko Turismoaren Jokabide Kode Etikoa Nazio Batuen Erakundeak proposatutako Turismoaren Munduko Jokabide Kode Etikoan du inspirazioa, baina Euskadiren idiosinkrasiara egokitua. Kode hau nazioarteko estandarrak oinarri hartuta, Euskadiko turismo-eragile desberdinen parte-hartzearekin osatu zen.

  Jokabide kode etikoaren lehen edizioa argitaratu zenetik 5 urte igaro direnean, eta metodologia barneratua eta sendotua dagoela kontuan hartuta, edizio berria berrikusi eta diseinatu da, publiko guztientzat atseginagoa, gertukoagoa eta ulerterrazagoa izan dadin. Bigarren edizio honetan, gainera, kodea berrantolatu da eta lehengo zortzi printzipioak seitan batu dira. Ohitura, kultura eta baliabide turistikoen errespetua, aniztasunaren defentsa, babesa zein zaintza dira printzipio horien oinarri nagusiak. 

  Euskadin Kode Etikoari atxikitako 765 enpresa akreditatuta zeuden eta guztiek ziurtagiria berritu dute. Horien artean Debagoieneko 28 daude, Oñatiko 10, hau da, eskualdean agiria duten hirutik bat. Turismo bulegoa, Arrikrutz kobak, Txokolateixa, Arantzazuko Aterpetxea eta Parketxea, Debagoieneko turismo informazio eta interpretazio zentroa, Arregi landetxea eta Etxe Aundi, Torre Zumeltzegi eta Goiko Benta dira Turismo Kode Etikoa ziurtagiria duten herriko zerbitzu eta enpresak.

  Asteazkenean egin zen Euskadi Turismo Kode Etikoari atxikitako enpresen aitortza-ekitaldia. Gasteizko Europa Jauregian izan zen, NBEaren turismoko munduko etika batzordeko kideak bertan zirela. Izan ere, batzorde honek 33. topaketa egin baitzuen Gasteizen, bezperan.

Iturria: Oñati Irratia