Latzen taldea bueltan izango da Hatortxu Rock jaialdian

  Jaialdiaren antolatzaileek bigarren itzulera eguna izendatu dute gaurkoa eta egunean zehar Lakuntzan jotzeko agertokietara itzuliko diren lau talderen izenak kaleratuko dituztela adierazi dute, horietan lehena Latzen oñatiarrak. 17 urte dira Latzen eszenatokietatik jaitsi zela, 2007an osatu zuen itzulera biraren ondoren. Itzulera hura 8 urte lehenago taldea banatu ondoren etorri zen eta Helmuga disko eta DVDan jasota geratu zen. 

  Latzen taldea 1993an sortu zuten, Aitor Uriartek, Iker Martinez de Zuazok, Joxe Mari Azpitartek eta Gorka Lazkanok. Heriotzari deika maketa kaleratu zuten 1995ean eta bi disko etorri ziren ondoren: Kontzientzia ala infernua, 1996an, eta Ardi larruz, 1998an. Laztana balada da taldearen kanta arrakastatsuena, dudarik gabe, baina zerrendan, Ze ingo xu?, Torturaren artea edota IHESa ihes aipatu daitezke, besteak beste. Horietako asko berriro zuzenean eta protagonisten ahots eta eskutik entzungo dira aurtengo Hatortxu Rock jaialdian. 

  Latzen taldeko kide gehienak entseguetan hasita daude. Yerko Ortiz legazpiarrak hartu du Iker Martinezen lekua eta gaur jakinazari da Hatortxu Rock jaialdian arituko direla. Azken Hatortxu izango da aurtengoa, eta Latzen arduratuko da jaialdiaren itxieraz, uztailaren 27an. Badirudi ez dela emanaldi bakarreko itzulera izango baina gerora emango dituzten kontzertuen berririk ez da zabaldu oraindik. 

  Oñatiko bi talde izango dira Lakuntzan, azken Hatortxu jaialdian, Sukena taldeak ere bertan joko duela jakinekoa zen, lehendik. Antolatzaileek kartela betetzen jarraitzen dute. Latzenekin batera Skatu iruindarren eta AFUren itzulera ere iragarri dute gaur; laugarren talde bat ere jakinaraziko ei da 18:00etan. Horiei batu behar zaizkie lehendik egitarauan zeuden beste asko: Buitraker, Autobus Magikoa, Never Surrender, Tatxers, Dupla, Skabidean, Chulería, Joder!, Gatibu, Brigade Loco, Non ServiumBulego, La Jodedera, Ibil Bedi, Süne, Kaotiko, Banda Bassotti, Betagarri, Eñaut Elorrieta, Gozategi eta abar.

Iturria: Oñati Irratia