Komunikazio arloko teknikarien lan poltsa eratuko du Udalak

  Udal aldizkaria eta irratian sortu daitezkeen aldi baterako beharrei erantzuteko lan poltsa osatu asmo du Udalak eta horretarako deialdia argitaratu du Gipuzkoako Aldizkari Ofizialean. Oposizio-lehiaketa sistemaz eratuko den lan poltsara presentatu ahal izateko kazetaritza edo ikus-entzunezko komunikazioko unibertsitate gradu, lizentziatura edo pareko titulazio akademikoa izatea eskatzen da eta 4. hizkuntza eskakizunaren mailako euskara maila. Lehiaketa fasean, esperientzia profesionala eta formakuntza osagarria baloratuko dira.

  Komunikazio arloko teknikariak udalean eta herri mailan sortzen diren albiste, deialdi eta jardueren jarraipena egin beharko du eta horiek aldizkarirako edo irratirako idatzi eta prestatu beharko ditu. Horretarako, erakunde, elkarte, instituzio, herriko eragile eta sustatzaileekin harremanetan egon beharko da. Argazkiak atera eta kudeatu beharko ditu, aldizkariaren kasuan argitalpenarekin lotutako prozesuaz arduratu beharko du eta, irratiaren kasuan, grabazioak egin eta  irratsaioak osatu beharko ditu. Gainera, Berbia Oñati sare sozialak elikatu eta kudeatzeaz arduratu beharko da, besteak beste. Komunikazio arloko teknikarien lan poltsa honetara aurkezteko izen-ematea maiatzaren 7an itxiko da.

  Udaleko Kultura departamentuak, bestalde, haurren pintura ikastaroetarako irakaslea topatu nahi du. Egun martxan diren haur eta gazteen pintura ikastaroetako irakasleak ez du jarraituko eta 2024-2025 ikasturterako irakasle berria behar da. Horretarako deialdia zabaldu da Kultur etxetik, azken ordura arte itxaron gabe. 

  Arte ederretako gradua edota erdi mailako unibertsitate titulua izan eta C1, EGA edo hirugarren hizkuntza eskakizunaren pareko euskara maila duten hautagaien bila ari dira. Artearen inguruan irakasle lanetan jardun izana eta arte udalekuetan begirale gisa esperientzia izatea baloratuko da. Kultura departamentuak haur eta gazteentzat antolatu ohi dituen pintura ikastaroak 6 eta 18 urte bitartekoei zuzenduta daude eta azarotik maiatza bitartean, arratsaldez ematen dira, egunaren arabera, ordutegi ezberdinean. 

  Pintura ikastaroetako irakasle izan nahi dutenek, eskaerak Kultur etxean aurkeztu behar dituzte, aurrez aurre, edo idazkaritza@onati.eus helbidera bidalita. Horretarako azken eguna apirilaren 13a izango da. Hautagaiek kurrikulama, eskatutako baldintzak betetzen dituztenaren egiaztagiriak, sexu delitugileen ziurtagiri negatiboa eta nortasun agiria aurkeztu behar dute. Horrezaz gain, jarduera ekonomikoen gaineko zergan alta emateko prest egon behar dira. Informazio gehiagorako Kultur etxera zuzendu daiteke.

Iturria: Oñati Irratia