Kiroldegi atzealdean egokitu den disuasio-aparkalekua bihar asfaltatuko da

  Kiroldegiko kantxa urdinaren atzean bisitarientzako disuasio-aparkalekua egokitzen ari dira. Lanak oso aurreratuta daude eta zorua bihar goizean asfaltatuko dute. Arratsaldean, berriz, anbulaorio aldameneko aldapan dauden zangak estali eta asfaltatuko dira. Lan hauek ez dute trafikoan eraginik izango, bai ordea, datorren astelehen eta asteartean egingo diren margoketa lanek, izan ere, disuasio aparkaleku berria ez ezik, anbulatorio atzealdeko aparkalekua ere margotuko baita.

  Anbulatorio ondoko parking-a mugatu dago, behin behinean. 26 aparkaleku kendu ziren, kamioien joan-etorria errazteko, eta erabilgarri dauden 20 aparkalekuak desgaitasuna duten pertsonentzako eta osasun zentroko zerbitzuetarako gorde dira. Baina datorren aste hasieran, astelehenean eta asteartean, inork ezingo du bertan aparkatu, margotze-lanak egin ahal izateko. Ondorioz, osasun etxeko zerbitzuetarako egin ziren baimen txartelak kiroldegi ondoko lurpeko aparkalekuan aparkatzeko erabili ahal izango dira. Margotze-lanak amaituta, anbulatorio atzealdeko aparkalekua normaltasunez irekiko da asteazken goizean berriro baina disuasio aparkalekua oraindik ez. Azken elementuen instalazioa egin eta plazak libre dauden azalduko duen panela ere jarri behar delako San Juan kaleko biribilgunean.

  Kiroldegi atzealdeko disuasio-aparkalekuak 16 plaza izango ditu, joan- etorriko errei bakarra eta itzulia egiteko gunea. Aparkaleku bakoitzak ibilgailuak antzemateko sentsore berezia izango da eta okupatu edo libratzen denean, San Juan kaleko biribilgunean jarriko den panelean islatuko da informazioa. Pantailak semaforo bat izango du. Disuasio-aparkalekua argiztatuko da, ibilgailu elektrikoentzat bereizitako gunea prestatuko da eta euri urak bilduko dituen drainatze sistema egin da, ibilgailu elektrikoentzat bereizitako gunea prestatuko da eta beharrezko seinaleztatze horizontal eta bertikala jarriko da.

Iturria: Oñati Irratia