Hirigune historikoan termiten izurritea kentzeko eta kontrolatzeko zerbitzua kontratatuko da

  Berez ez da Udalaren eskumena termiten izurriteak kontrolatzea baina arazo bihurtu aurretik esku hartzea erabaki da eta horretarako baimena eskatuko zaie Eusko Jaurlaritzari eta Gipuzkoako Foru Aldundiari. Hala jakinarazi zen osteguneko Osoko Bilkuran. 

  Hirigune historikoan dauden eraikinetan termiten afektazio maila ezagutzeko, egurrezko egitura duten 109 eraikin eta 13 orube ikuskatu ziren iaz eta 34 eraikinetan termita jarduera izan dutela edo dutela ondorioztatu zuten teknikariek. Gainera, beste 70 eraikinetan eraso arriskua antzeman zuten. Beraz, egurrezko egitura duten kasik eraikin guztiak mehatxupean daude, Tecnaliak osatu zuen txostenaren arabera.

  Lana lehenbailehen hastea komeni da, udaberriarekin termiten aktibitatea bizitu egiten delako. Horregatik, izurritea kendu eta kontrolatzeko zerbitzuaren kontratazio oinarriak onartu ziren azken Osoko Bilkuran eta esleipenerako prozesua datozen egunotan abiatuko da. Oñatiko hirigune historikoan termiten izurritea deuseztatu eta kontrolatzeko zerbitzua bost urtetarako kontratatuko da, 2025etik 2029ra. Horrek, konpromiso kreditua onartzea ekarri du, datozen lau urteetako aurrekontuei begira. Esleipenerako aurrekontua 87.000 eurotan, BEZ kanpo, finkatu da baina prozesuan merkatzea espero da, prezioak eta berme epea luzatzeak puntuazio osoaren %75a hartuko baitu. Gainontzeko %25a, enpresek aurkeztutako txosten teknikoaren arabera banatuko da. Esleipenerako baldintza teknikoetan termitak kontrolpean edukitzeko printzipio aktibo moduan hexaflumuroia duen sistema erabiltzea zehaztu da eta amu solidoak erabiltzeko aukera ematea ere eskatuko da; amu solidoek lixibiazioa saihesten dute eta eraginkorragoak dira, ez baitaude berrikuspenen maiztasunaren menpe. Baina oinarriak bere osotasunean laster ikusi ahal izango dira Udalaren web atariko Kontratatzailearen profila atalean.

Iturria: Oñati Irratia