Herribusak gutxieneko zerbitzuak beteko ditu bihar

  Herribus zerbitzua eskaintzen duen Leintz Garraioak enpresako langileek bat egin dute autobus gidarien biharko greba deialdiarekin. Erretiro adina aurreratu ahal izatea eskatzen dute, eta grebara deitutako zazpi egunetako laugarrena beteko dute. Ondorioz, Eusko Jaurlaritzak agindutako %30eko gutxieneko zerbitzuak beteko dira Herribus zerbitzuan; guztira, 8 bidaia beteko dira, zerbitzuak dauzkan hiru lineatan. Goizeko lehen orduko zerbitzuak beteko dira, 7:30etatik 8:30etara, eguerdian beste bi izango dira, 13:30etan eta 14:00etan, eta ilunkaran azken hirurak, 19:30etatik 20:30etarako tartean.

  Urriaren 28an eta azaroaren 28 eta 29an ere greba egin zuten hainbat autobus gidarik, tartean, Herribusekoek. Avanza autobus zerbitzuko gidariek ere bat egin dute biharko deialdiarekin, eta ondorioz, Debagoiena barruko eta eskualdea hiriburuekin lotzen dituen zerbitzuetan ere eragingo du grebak.

  CCOO sindikatuek deitu ditu autobus gidariak grebara. Erretiroko adina aurreratzea da aldarrikapen nagusi, esan bezala. Urtea amaitu baino lehen beste hainbat greba egingo dituztela iragarri dute, abenduaren 9a eta 23a dira hurrengo greba egunak.

Iturria: Oñati Irratia