Errepide mozketa eta autobus zerbitzuan etenak izango dira bihar arratsaldean, duatloia dela eta

  Bihar arratsaldean Oñatiko Duatloia jokatuko da eta bizikletako tartean lehiakideek Elorregiraino eta Urtiagaineraino joan beharko dutenez, Oñati eta Elorregi arteko GI-2630 errepidea trafikorako guztiz itxiko da 15:50etatik 18:10etara. Mozketa honek Zañartu inguruko errepideei ere eragingo die, kirolariek Santipillau igoko baitute. Arantzazurako GI-3591 errepidea ere itxiko 16:30etatik 17:30etara. Hori, herri inguruko errepideei dagokienean, baina herri barruan ere, tarteka zenbait kale trafikorako itxiko dira arratsaldeko 15:30ak eta 19:00ak bitartean, Bidaurretako biribilgunetik Kasablankako irteeraraino.

  Oñati eta Elorregi arteko errepidea ixteak Bilborako eta Arrasate eta Zumarraga arteko autobus zerbitzuetan eragingo du, autobusak ez direlako Oñatiraino iritsiko, duatloiak dirauen bitartean; Bilborako DG02 linea 18:15etan irtengo da Oñatitik eta 5 minutu ondoren iritsiko da San Prudentziora eta Arrasate eta Zumarraga arteko zerbitzua eten egingo da 15:30etatik 18:40etara. Ordu tarte berean, Elorregiko geltokia lekuz aldatuko da eta autobusak biribilguneko bazterbidean geratuko dira bidaiariak hartu eta uzteko.

Iturria: Oñati Irratia