Emakumeentzako Jabetze Eskolan izena emateko epea zabalik dago, urtarrilaren 22ra arte

  Aurreko egunetan banatu zen etxeetara Jabetze Eskolaren negu-udaberriko eskaintzaren liburuxka. Emakumeentzat nagusiki baina baita gizonezkoentzat ere, 9 ikastaro eta tailer programatu dira. Udazkenetik datozen hiru talderi jarraipena emango zaie, parte hartzaile berriei lekua egitearekin batera: Irakurketa feminista taldea, amatasuna eta feminismoa gogoeta taldea eta gizonak parekidetasunerantz. Gizonentzako foro irekia. Hiru taldeak hiru astean behin elkartuko dira. Pentsalari eta ekintzaile latinoamerikarren testuak lantzen diharduen irakurketa taldearen hurrengo bilera urtarrilaren 29an izango da eta asteazkenetan elkartuko da. Amatasuna eta feminismoa gogoeta taldeak 15 orduko jardun orokorra izango du eta ostegunetan elkartuko da. Gizonentzako foro irekia, berriz, otsailaren 12an elkartuko da, asteazkenetan.

  Negu-udaberriko ikastaro eta tailer proposamenetan laburrena, jeloskortasuna bikote harremanetan tailerra izango da, egun bakarrean, martxoaren 22an egingo da eta hiru orduko iraupena izango du. Bestela, Feminismoa, ez feministentzat, autodefentsa feminista eta Barrez lehertzen. Umore tailerra ikuspegi feministatik ere egun bakarrekoak izango dira, lehena, bost ordukoa, goizez egingo da, besteak, sei eta zazpi ordukoak, hurrenez hurren, goiz eta arratsaldeko jardunetan osatuko dira. Luzeagoak izango dira komunikazio asertiboa eta chi kung ikastaroak, 16 eta 12 ordukoak, hain zuzen.

  Urtarriletik maiatzera luzatuko diren ikastaro eta tailerretan izen-emateko epea zabalik dago, urtarrilaren 22ra arte. Izena udaleko web ataritik eman daiteke edota informazio-liburuxken atzealdeko orria beteta, udaletxeko HAZ bulegoan utzi daitezke.

Iturria: Oñati Irratia