Elkarteen betebehar legal eta fiskalei buruzko formakuntza saioa antolatu du Udalak

  Partaidetza eta Garapen Komunitarioko departamentuak lau orduko formazioa antolatu du, herriko elkarteei zuzenduta; betebehar legal eta fiskalak argituko dira, elkarteetako arduradunek administrazio eta kontabilitate oinarriak barneratu ditzaten. Ikastaro teoriko-praktikoa elkarren segidako bi astelehenetan emango da, apirilaren 28an eta maiatzaren5ean, 18:00etatik 20:00etara. 

  Irabazi asmorik gabeko elkarteen lege eta kontabilitate esparrua ulertu eta integratzeko, eta administrazio eta kontabilitate jardunbide egokiak ezagutu eta aplikatzeko ikastaroa izango da. Saioak parte-hartzaileak izango dira eta elkarteen ordezkariek beraien kasuak partekatzeko aukera izango dute eta eguneroko kudeaketa erraztuko dieten trikimailuak, tresnak eta programak ezagutu eta barneratzeko bidea eskainiko zaie.

  Legez eratutako elkarteei eta egoitza nagusia, edo legez eratutako ordezkaritza, Oñatin dutenei zuzenduta dago deialdia. Plazak mugatuak dira eta gehienez 25 lagunek parte hartu ahal izango dute, horrek, elkarte bakoitzeko partaide kopurua ere mugatzea ekarri du eta gehienez bi kidek eman ahal izango dute izena. Baina muga goitik jarri den bezala behetik ere jarri da eta gutxieneko partaidetza bat ziurtatu ezean ikastaroa ez da egingo. Elkarteen betebehar legal eta fiskalei buruzko formazio saio hauetan izena emateko epea zabalik dago, apirilaren 11ra arte. Izena, aurrez aurrez, udaletxean, HAZ zerbitzuen eman daiteke edo posta elektronikoz, mezua, partaidetza@onati.eus helbirdera bidalita. 

  Gazteleraz izango den ikastaroa egiteko ordenagailua beharko dela jakinarazi dute eta halakorik ez dutenei antolatzaileekin harremanetan jartzea eskatzen zaie.

Iturria: Oñati Irratia