Azken hilabeteotan argitaratutako euskal liburuak ikusgai daude Udal liburutegian

  Durangoko azokara begira azken hilabeteotan kaleratu diren euskal liburuak modu bateratu eta ikusgarriagoan jarri dira Kultur etxeko helduen liburutegian. Bi astez mantenduko dira propio osatu diren bi erakusmahaitan, interesa duen orok ikusi, aztertu eta, nahi izatera, maileguan eraman ditzan.

  Jakinekoa da euskal literatur produkzioaren garai emankorrenetakoa dela udazkena, Durangoko azoka abendua hastearekin baitator. Asko izango dira asteburuan Durangora hurbilduko direnak baina itsu-itsuan joan gabe, erosketa zerrenda aurrez prestatu nahi dutenek, liburutegitik pasa eta nobedadeak aurrez ikusi ahal izango dituzte. Durangoko jendetzatik aparte, lasaiago ibili nahi duenarentzat ere ikusi eta eskuragarri daude liburutegian, maileguan eraman daitezkeelako.

  Euskal literaturako azken nobedadeen erakusketa hau atzotik ikusgai dago udal liburutegian eta abendu erdialdera arte mantenduko dute.

Iturria: Oñati Irratia