Aurrekoetan baino irakasle gehiagok egin dute bat Oñatin Hezkuntza publikoan deitutako grebarekin

  Mahai teknikoak atzo egin behar zuten bilera bertan behera utzi ondoren Hezkuntza sailak eta sindikatuek elkarri leporatzen diote arazoa konpondu nahi ez izana; lanuzteak dauden bitartean ezin dutela negoziatu dio Eusko Jaurlaritzak eta fede txarrez jokatzea leporatzen diote sindikatuek. Bitartean, ikastetxe publikoetako irakasleak grebara deituta daude berriro, gaur eta bihar. Oñatin, aurreko zazpi greba egunetan baino eragin handiagoa izaten ari da gaurko deialdia, Urgain herri eskolako irakasleen % 80ak eta institutukoen erdiak greba egin baitu. Bata zein bestean ikastetxera doazen ikasleen zaintza bermatuta dago baina eskolak ez dira normaltasunez emango; Urgainen ez da eskolarik izango eta institutuan, Zuazola eta Larraña eraikinetan, irakaslea dagoen ordutan bakarrik emango da klasea. 

  Azken hiru hilabeteotako zortzigarren greba eguna dute gaur Hezkuntza Publikoko irakasleek eta biharko ere lana uzteko deialdia egina dute LAB, Steilas, ELA eta CCOO sindikatuek. Azken 15 urteetan berritu ez den lan hitzarmena eguneratzea, lan-zama eta burokrazia arintzea, plantilak gaztetzeko plana garatzea, galdutako erosahalmena berreskuratzea, enplegu publikoa egonkortzea, langileen lan osasuna bermatzea eta hezkuntza publikoko sistema osoa euskaldunduko duen hizkuntza politikak abiaraztea eskatzen dute, besteak beste, irakasleek. Atzoko bilera teknikoa bertan behera utzi ondoren ez da negoziatzen jarraitzeko hitzordu berririk jakinarazi.

Iturria: Oñati Irratia