7.000 kilo produktu bidali dira Oñatitik Valentziara

  Herritar talde baten ekimenez Valentziarako materiala bilketa egin da herrian. Jasotako erantzuna oso handia izan da eta bilketa aurreikusitakoa baino lehenago eten beharra izan zuten, gainezka eginda. Hasieran, Urretxutik gaur irten den kamioi batean eramateko asmoa zegoen, baina bertatik beste kamioi bat kontratatuta, igorri da jasotakoaren zati handi bat, ez dena. 7 tona produktu bidali dira Oñatitik Valentziara. Atzo arratsaldean kargatu zen kamioia eta berehalakoan irten zen DANAk eragindako uholdeak kaltetutako zonaldera, konkretuki Catarroja herrira. Gaur goizean iritsi da. Bitartean, eta auto partikularretan, Oñatiko hainbat herritar doaz, boluntario moduan eta ahal denean laguntzera.

  Oñatiarren eta valentziarren arteko harremanetarako bitartekaria Catarrojako errugbi taldea izan da. Honen bitartez laguntza planifikatu eta koordinatzeko pertsona konkretu bat ezagutu dute eta material bilketa abian jarri ahal izan dute, justu zer behar den jakinda. Banaketarako ere Catarrojako lagun hori erreferentzia izango da.

  Oñatitik goizean zehar irten diren herritar boluntarioek ez dakite zerekin egingo duten topo. Zenbait adineko etxean, irten ezinda ei dago pasa den asteartetik. Laguntza beraiengana iritsaraztea premiazkoa da baina zer eta nola, bertan daudenean ikusiko dute. Beti ere, bertakoen esanetara eta beharretara jartzeko asmotan doazela adierazi digute.

  Garbiketako produktuak eta tresnak, norberaren higienerako produktuak, umeentzako jana, arropa, pixoihalak eta antzerakoak batu dira, nagusiki, Oñatin. Baina bildutako dena ezin izan da bidali, kamioi handiagoa beharko litzatekeelako. Hainbat gauza, aurrerago bidaltzeko gorde dira, galerak handiak direlako eta datozen asteetan ere, laguntza eta produktu beharra izango delako.

Iturria: Oñati Irratia