Gabonetako emanaldi bereziak Oñati Irratian

Gabonetako egun seinalatuetan, eta bezperan, Oñati Irratiak emanaldi bereziak eskaintzeko ohitura dauka. Aurten ere, hala egingo du. Urtean zehar herrian izan diren bertso jaialdiak jaso ditu eta abenduaren 24, 31 eta urtarrilaren 1ean emango ditu, 10:00etan hasiko diren saio berezietan.

Baina guztietan bereziena, abenduaren 25eko irratsaioa izango da. Eguberri eguneko saioa osatuko du Mikel Aranburuk, azken urteetan egin bezala. Gabonak atzerrian emango dituzten oñatiarrak elkarrizketatuko ditu eta pantaila txikian eta eszenatokietan bere ibilbidea egiten ari den herritar bat gonbidatuko du estudiora. Entzuleentzako sariak ez dira faltako, Odriozola harategiaren, Mauxka jatetxearen eta Txinparta Bertso Eskolaren eskutik. Abenduaren 25eko irratsaioa ere, 10:00etan hasiko da.